saañs lete hue bhī Dartā huuñ

ye na samjheñ ki aah kartā huuñ

bahr-e-hastī meñ huuñ misāl-e-habāb

miT hī jaatā huuñ jab ubhartā huuñ

itnī āzādī bhī ġhanīmat hai

saañs letā huuñ baat kartā huuñ

shaiḳh sāhab ḳhudā se Darte hoñ

maiñ to añgrezoñ hī se Dartā huuñ

aap kyā pūchhte haiñ merā mizāj

shukr allāh kā hai martā huuñ

ye baḌā aib mujh meñ hai 'akbar'

dil meñ jo aa.e kah guzartā huuñ