lutf zindagānī kā shauq-e-ārzū meñ hai
jazba-o-junūñ meñ hai sa.ī-o-justujū meñ hai
jo sukūn-e-ḳhātir hai us ke aib meñ dilkash
chāshnī hai luknat hai sehr guftugū meñ hai
us ke qurb kī lazzat mujh se kyā bayāñ hogī
be-panāh kaifiyyat sirf aarzū meñ hai
zahr zindagānī kā pī ke aql aa.ī hai
dārū-e-ġham-e-hastī talḳhī-e-subū meñ hai
bhiiḌ meñ zamāne kī ham sadā akele the
vo bhī duur hai kitnā jo rag-e-gulū meñ hai
baat 'jāmī'-sāhib kī talḳh bhī hai shīrīñ bhī
dard halkā halkā sā tarz-e-guftugū meñ hai