baat kyā hai ye batā.eñ to sahī

guftugū aage baḌhā.eñ to sahī

jaan jā.eñge kharā khoTā hai kyā

aap mujh ko āzmā.eñ to sahī

uñgliyāñ uTTheñgī chāroñ aap par

aap ik uñglī uThā.eñ to sahī

banda-parvar nā-umīdī kufr hai

ik diyā phir se jalā.eñ to sahī

chāñd taare muntazir haiñ aap ke

āsmāñ tak aap jaa.eñ to sahī

vasl kar degā ḳhizāñ ko fasl-e-gul

phuul bāloñ meñ lagā.eñ to sahī

dekhiye suniye are jaane bhī deñ

aap mere saath aa.eñ to sahī

ḳhud ko rakh kar bhuul baiThī huuñ kahīñ

maiñ kahāñ huuñ kuchh batā.eñ to sahī

aap to bas ghar banā kar rah ga.e

aap is ghar ko basā.eñ to sahī

chuTkiyoñ meñ bhuul jā.ūñgī unheñ

ab mujhe vo yaad aa.eñ to sahī

niiñd āñkhoñ se ḳhafā ho jā.egī

ḳhvāb palkoñ par sajā.eñ to sahī

jaan le lūñgī qasam allāh kī

bhuul kar mujh ko bhulā.eñ to sahī

āzmāne ke liye qismat 'sabīn'

dil ko daav par lagā.eñ to sahī