ishq ne mere jise alqāb kā daftar diyā
us ne sone ko mujhe kāñToñ bharā bistar diyā
merī tahrīroñ se ḳhā.if ho ke phir aġhyār ne
rañg koī aur afsānoñ meñ mere bhar diyā
tere āñgan se utartī chāñdnī ne ab talak
ḳhauf baḳhshā siskiyāñ diiñ aur mujh ko Dar diyā
jā tirī jholī meñ maiñ ne apnī ḳhushiyāñ Daal diiñ
jā tire dāman ko ummīdoñ se maiñ ne bhar diyā
terī chāhat kā bharam rakhne kā saudā sar meñ thā
ham ne apnā ghar diyā phir zar diyā phir sar diyā
jab hunar us kī mohabbat kā khulā mujh par 'sabīn'
qaid us ne ghar kī dīvāroñ meñ mujh ko kar diyā