tanhā chhoḌ ke jaane vaale ik din pachhtāoge
aas kā sūraj Duub rahā hai lauT ke ghar kab aaoge
nafrat ko mahsūr kiyā hai ulfat kī dīvāroñ meñ
jin rāhoñ se guzroge tum pyaar kī ḳhush-bū pāoge
dil kī vīrāñ nagrī pe ab ġham ke bādal chhā.e haiñ
dukh kī kaalī raat meñ bolo kab tak saath nibhāoge
koyal to patthar ke Dar se āḳhir ko uḌ jā.egī
bādal to pāgal hai us ko kaise tum samjhāoge
tum to ḳhud sahrā kī sūrat bikhre bikhre lagte ho
'farruḳh' se 'farruḳh' ko socho kaise tum milvāoge