mujhe ab nayā ik badan chāhiye
aur us ke liye bāñkpan chāhiye
maiñ ye sochtā huuñ asar ke liye
sadā chāhiye yā suḳhan chāhiye
bhaTakne se ab maiñ bahut tañg huuñ
zamīñ qaid kar le vatan chāhiye
nashe ke liye ik nayā shīsha ho
aur us meñ sharāb-e-kuhan chāhiye
ye āñkheñ ye dil ye badan hai tirā
tujhe aur kyā jān-e-man chāhiye
bahut tursh lagne lagī zindagī
koī mīThī mīThī chubhan chāhiye