har-chand gaam gaam havādis safar meñ haiñ
vo ḳhush-nasīb haiñ jo tirī rahguzar meñ haiñ
tākīd-e-zabt ahd-e-vafā izn-e-zindagī
kitne payām ik nigah-e-muḳhtasar meñ haiñ
maazī sharīk-e-hāl hai koshish ke bāvajūd
dhuñdle se kuchh nuqūsh abhī tak nazar meñ haiñ
lillāh is ḳhulūs se pursish na kījiye
tūfān kab se band mirī chashm-e-tar meñ haiñ
manzil to ḳhush-nasīboñ meñ taqsīm ho chukī
kuchh ḳhush-ḳhayāl log abhī tak safar meñ haiñ
mahfil meñ un kī samt nigāheñ na uTh sakīñ
ham bil-ḳhusūs ahl-e-nazar kī nazar meñ haiñ
ye kaise rāh-rau the ki har naqsh-e-pā ke saath
sajdoñ ke kuchh nishān bhī is rahguzar meñ haiñ