vahī hotī hai rahbar jo tamannā dil meñ hotī hai
ba-qadr-e-himmat-e-rah-rau kashish manzil meñ hotī hai
mohabbat dil meñ hotī hai tamannā dil meñ hotī hai
javānī umr kī kitnī hasīñ manzil meñ hotī hai
mohabbat ai ma.āz-allāh mohabbat dam nikal jaa.e
agar mahsūs bhī utnī ho jitnī dil meñ hotī hai
Thaharne bhī nahīñ detī hai us mahfil meñ betābī
magar taskīn bhī jā kar usī mahfil meñ hotī hai
mirā kyā saath deñge ġhair bahr-e-ishq meñ 'bismil'
vo us kashtī meñ haiñ jo dāman-e-sāhil meñ hotī hai