muddat se koī un kī tahrīr nahīñ miltī

kuchh dil ke bahalne kī tadbīr nahīñ miltī

har ik ko nahīñ hotā irfān mohabbat kā

har ik ko mohabbat kī jāgīr nahīñ miltī

bachchoñ ko to is tarah jalte nahīñ dekhā thā

tārīḳh meñ kuchh aisī tahrīr nahīñ miltī

punjab ko dekho to ik aag kā dariyā hai

kashmīr meñ jannat kī tasvīr nahīñ miltī

is desh ke logoñ ne chālīs baras pahle

ik ḳhvāb to dekhā thā ta.abīr nahīñ miltī