vo rūThtā hai kabhī dil dukhā bhī detā hai
maiñ gir paḌūñ to mujhe hausla bhī detā hai
vo merī raah meñ patthar kī tarah rahtā hai
vo merī raah se patthar haTā bhī detā hai
bahut ḳhulūs jhalaktā hai tanz meñ us ke
vo mujh pe tanz ke nashtar chalā bhī detā hai
maiñ ḳhud ko bhuul na jā.ūñ bhaTak na jā.ūñ kahīñ
vo mujh ko aa.ina lā kar dikhā bhī detā hai
use aziiz haiñ ġhazleñ mirī mire ash.ār
vo mere sher mujhī ko sunā bhī detā hai