jab kisī yaad ke mandir meñ gajar bol paḌā
ik mo.azzin bhī sar-e-vaqt-e-sahar bol paḌā
dekh kar mere ḳhad-o-ḳhāl ko ik ā.īna
kitnā ḳhāmosh tabī.at thā magar bol paḌā
roz chup-chāp vo raste se guzar jaatā hai
aur maiñ sochtā rahtā huuñ agar bol paḌā
mere aane kī ḳhushī thī ki taġhāful kā gila
ek muddat se jo ḳhāmosh thā dar bol paḌā
phir fazāoñ meñ suḳhan gholne bādal aa.e
phir chalī tez havā aur shajar bol paḌā