sunī hai chaap bahut vaqt ke guzarne kī
magar ye zaḳhm ki hasrat hai jis ke bharne kī
hamāre sar pe to ye āsmān TuuT paḌā
ghaḌī jab aa.ī sitāroñ se maañg bharne kī
girah meñ daam to rakhte haiñ zahr khāne ko
ye aur baat ki fursat nahīñ hai marne kī
bahut malāl hai tujh ko na dekh paane kā
bahut ḳhushī hai tirī raah se guzarne kī
batāo tum se kahāñ rābta kiyā jaa.e
kabhī jo tum se zarūrat ho baat karne kī