jo ashk barsā rahe haiñ sāhib
ye rā.egāñ jā rahe haiñ sāhib
yahī taġhayyur to zindagī hai
abas ghule jā rahe haiñ sāhib
jo ho gayā hai so ho gayā hai
fuzūl pachhtā rahe haiñ sāhib
ye sirf gintī ke chaar din haiñ
baḌe maze aa rahe haiñ sāhib
abhī to ye ḳhaak ho rahegā
jo jism chamkā rahe haiñ sāhib
koī irāda na koī jaada
kahāñ kidhar jā rahe haiñ sāhib
idhar zarā ġhaur se to dekheñ
ye phuul murjhā rahe haiñ sāhib
jahāñ kī nāyāft ke sabab meñ
jahāñ kā ġham khā rahe haiñ sāhib
ye maiñ nahīñ huuñ ye merā dil hai
ye kis ko samjhā rahe haiñ sāhib
sukūn kī niiñd soiyegā
vo din bhī bas aa rahe haiñ sāhib
jo aap ke hijr meñ mile haiñ
ye din gine jā rahe haiñ sāhib
bas ab nahīñ kuchh bhī yaad mujh ko
bas aap yaad aa rahe haiñ sāhib