kisī kī qaid se āzād ho ke rah ga.e haiñ
tabāh ho ga.e barbād ho ke rah ga.e haiñ
ab aur kyā ho tamannā-e-vasl kā anjām
dil o dimāġh tirī yaad ho ke rah ga.e haiñ
kaheñ to qissa-e-ahvāl muḳhtasar ye hai
ham apne ishq kī rūdād ho ke rah ga.e haiñ
kisī kī yaad diloñ kā qarār Thahrī hai
kisī ke zikr se dil shaad ho ke rah ga.e haiñ
tire huzūr jo rashk-e-bahār the 'ajmal'
ḳharāb-o-ḳhvār tire ba.ad ho ke rah ga.e haiñ