suḳhan kā us se yaarā bhī nahīñ hai

suḳhan ke bin guzārā bhī nahīñ hai

bayāñ sheroñ meñ ham karte haiñ jitnā

vo is darja to pyārā bhī nahīñ hai

bahut shikve haiñ us ko zindagī se

magar marnā gavārā bhī nahīñ hai

nazar meñ jitnī hairānī hai utnā

anokhā to nazāra bhī nahīñ hai

libās-e-jāñ tujhe vāpas to de duuñ

magar ik qarz utārā bhī nahīñ hai

nikal aa.e dil-e-vīrāñ kī jānib

koī qismat kā maarā bhī nahīñ hai

sahārā us kā lenā paḌ gayā hai

jo ḳhud apnā sahārā bhī nahīñ hai

jise 'zīshān' baḌh kar roknā thā

use maiñ ne pukārā bhī nahīñ hai