shakl-e-jānāna jā-ba-jā haiñ ham
kahīñ naaz aur kahīñ adā haiñ ham
kahīñ iisā haiñ ham kahīñ murda
kahīñ zinda kahīñ fanā haiñ ham
kahīñ aalā haiñ aur kahīñ adnā
kahīñ sultāñ kahīñ gadā haiñ ham
haiñ kahīñ āshiq-e-jigar-e-ḳhasta
kahīñ ma.ashūq-e-dil-rubā haiñ ham
kahīñ qatra haiñ aur kahīñ dariyā
kahīñ kashtī ke nāḳhudā haiñ ham
haiñ kahīñ ham davā-e-dāfa-e-dard
aur kahīñ dard-e-lā-davā haiñ ham
kahīñ haiñ shaah sūrat-e-ḳhādim
aur kahīñ 'āsim'-e-gadā haiñ ham