reza reza tire chehre pe bikhartī huī shaam

qatra qatra mirī palkoñ pe utartī huī shaam

lamha lamha mire hāthoñ se saraktā huā din

aur āseb-zada dil meñ utartī huī shaam

sub.h kā ḳhvāb magar ḳhvāb ajab jāñ-levā

mere pahlū meñ sisaktī huī martī huī shaam

saath sāhil pe guzarte hue dekhī thī kabhī

yaad hai ab bhī samundar meñ utartī huī shaam

maiñ bhī tanhā huuñ to ye shaam bhī tanhā tanhā

ya.anī tanhā.ī meñ kuchh aur nikhartī huī shaam