tujh sā milegā maañ na koī mo'atabar mujhe
rahne de zer-e-pā tū yuuñ hī umr bhar mujhe
mujh ko guzārtī rahī maazī kī rahguzar
hasrat se dekhtā rahā miTTī kā ghar mujhe
merī sadā.eñ barsar-e-mahfil na jab rahīñ
duniyā ne tanhā chhoḌ diyā ḳhaak par mujhe
ik sher jaane kis ke tasavvur meñ kah diyā
barsoñ pukārtā rahā merā hunar mujhe
'hassān' qatl-o-ḳhūn ke manzar pe kyā likhūñ
har sar dikhā.ī detā hai apnā hī sar mujhe