haañ dhanak ke rañg saare khul ga.e
mujh pe tere sab ishāre khul ga.e
ek to ham khel meñ bhī the na.e
us pe patte bhī hamāre khul ga.e
jhiil meñ ā.ankhoñ kī tum utre hī the
aur ḳhvāboñ ke shikāre khul ga.e
narm hī thī yaad kī har pañkhuḌī
phir bhī mere zaḳhm saare khul ga.e
mujh ko jakḌe the ka.ī bandhan magar
tere bandhan ke sahāre khul ga.e
sulh āḳhir ho ga.ī jhagḌā miTā
bhed to lekin hamāre khul ga.e