ḳhalā meñ ghuur rahā hai ajiib aadmī hai

ajab talab meñ paḌā hai ajiib aadmī hai

yahāñ to bole binā baat hī nahīñ bantī

sukūt bech rahā hai ajiib aadmī hai

maiñ us ko chhoḌ rahā huuñ ajiib aadmī huuñ

vo merā saaya banā hai ajiib aadmī hai

abhī yahīñ thā abhī dekh to kahīñ bhī nahīñ

ye aadmī ki havā hai ajiib aadmī hai

maiñ jis kā dhyān baTātā rahā huuñ mushkil meñ

mujhe vo bhuul rahā hai ajiib aadmī hai