dekh paa.ī na mire saa.e meñ chaltā saaya
aa ga.ī raat uThāne mirā Dhaltā saaya
tum ne achchhā hī kiyā chhoḌ ga.e vaise bhī
ek saa.e se bhalā kaise sambhaltā saaya
maiñ vahī huuñ mirā saaya bhī vahī hai ab tak
maiñ badaltā to koī rañg badaltā saaya
maiñ ne is vāste muñh kar liyā sūraj kī taraf
mujh se dekhā na gayā aage nikaltā saaya
aaj bhī baiThā huuñ gum-sum pas-e-dīvār-e-anā
mujh se lipTā hai tirī yaad kā jaltā saaya
tujh pe guzrī hī nahīñ vahshat-e-shām-e-hijrāñ
tū ne dekhā hī nahīñ peḌ nigaltā saaya