koī is dil kā haal kyā jaane

ek ḳhvāhish hazār tah-ḳhāne

maut ne aaj ḳhud-kushī kar lī

ziist par kyā banī ḳhudā jaane

phir huā koī bad-gumāñ ham se

phir janam le rahe haiñ afsāne

vaqt ne ye kahā hai ruk ruk kar

aaj ke dost kal ke begāne

duur se ek chīḳh ubhrī thī

ban ga.e be-shumār afsāne

ziist ke shor-o-shar meñ Duub ga.e

vaqt ko nāpne ke paimāne

kitnā mushkil hai manziloñ kā husūl

kitne āsāñ haiñ jaal phailāne

raaz ye hai ki koī raaz nahīñ

log phir bhī mujhe na pahchāne