ġham-e-dil hīta-e-tahrīr meñ aatā hī nahīñ

jo kināroñ meñ simaT jaa.e vo dariyā hī nahīñ

os kī būñdoñ meñ bikhrā huā manzar jaise

sab kā is daur meñ ye haal hai merā hī nahīñ

barq kyuuñ un ko jalāne pe kamar-basta hai

maiñ to chhāñv meñ kisī peḌ kī baiThā hī nahīñ

ik kiran thaam ke maiñ dhūp-nagar tak pahuñchā

kaun sā arsh hai jis kā koī ziina hī nahīñ

koī bhūlā huā chehra nazar aa.e shāyad

aa.ina ġhaur se tū ne kabhī dekhā hī nahīñ

bojh lamhoñ kā har ik sar pe uThā.e guzrā

koī is shahr meñ sustāne ko Thahrā hī nahīñ

saaya kyuuñ jal ke huā ḳhaak tujhe kyā ma.alūm

tū kabhī aag ke dariyāoñ meñ utrā hī nahīñ

motī kyā kyā na pare haiñ tah-e-dariyā lekin

barf lahroñ kī koī toḌne vaalā hī nahīñ

is ke pardoñ pe munaqqash tirī āvāz bhī hai

ḳhāna-e-dil meñ faqat terā sarāpā hī nahīñ

hā.il-e-rāh the kitne hī havā ke parbat

to vo bādal ki mire shahr se guzrā hī nahīñ

yaad ke dā.ere kyuuñ phailte jaate haiñ 'shakeb'

us ne tālāb meñ kañkar abhī pheñkā hī nahīñ