mujh se milne shab-e-ġham aur to kaun aa.egā
merā saaya hai jo dīvār pe jam jā.egā
Thahro Thahro mire asnām-e-ḳhayālī Thahro
merā dil gosha-e-tanhā.ī meñ ghabrā.egā
log dete rahe kyā kyā na dilāse mujh ko
zaḳhm gahrā hī sahī zaḳhm hai bhar jā.egā
azm puḳhta hī sahī tark-e-vafā kā lekin
muntazir huuñ koī aa kar mujhe samjhā.egā
aañkh jhapke na kahīñ raah añdherī hī sahī
aage chal kar vo kisī moḌ pe mil jā.egā
dil sā anmol ratan kaun ḳharīdegā 'shakeb'
jab bikegā to ye be-dām hī bik jā.egā