vo ik savāl-e-sitāra ki āsmān meñ thā
tamām raat ye dil saḳht imtihān meñ thā
sukūñ sarāb zamīñ meñ jhulas gayā thā badan
na jaane kaun dhanak-rañg sā.ebān meñ thā
zarā sā dam na liyā thā ki muñd ga.iiñ āñkheñ
maiñ is safar se nikal kar ajab takān meñ thā
vo jaate jaate achānak muḌā thā merī taraf
mujhe yaqīñ hai ki vo phir kisī gumān meñ thā
use bhulāyā to apnā ḳhayāl bhī na rahā
ki merā saarā asāsa isī makān meñ thā