raqs-e-sharar kyā ab ke vahshat-nāk huā

jalte jalte sab kuchh jal kar ḳhaak huā

sab ko apnī apnī paḌī thī pūchhte kyā

kaun vahāñ bach niklā kaun halāk huā

mausam-e-gul se fasl-e-ḳhizāñ kī duurī kyā

aañkh jhapakte saarā qissa paak huā

kin rañgoñ is sūrat kī tābīr karūñ

ḳhvāb-nadī meñ ik shola pairāk huā

nādāñ ko ā.īna hī ayyār kare

ḳhud meñ ho kar vo kaisā chālāk huā

tārīkī ke raat azaab hī kyā kam the

din niklā to sūraj bhī saffāk huā

dil kī āñkheñ khol ke raah chalo 'mahfūz'

dekho kyā kyā aalam zer-e-ḳhāk huā