uTh jā ki ab ye mauqa hāthoñ se jā rahegā
ye kārvāñ hai āḳhir kab tak rukā rahegā
zaḳhmoñ ko ashk-e-ḳhūñ se sairāb kar rahā huuñ
ab aur bhī tumhārā chehra khilā rahegā
yuuñ to bahut hai mushkil band-e-qabā kā khulnā
lekin khulā to phir ye uqda khulā rahegā
sargarmī-e-havā ko dekhā hai paas dil ke
is aag se ye jañgal kab tak bachā rahegā
khultī nahīñ hai yārab kyuuñ niiñd raftagāñ kī
kyā hashr tak ye aalam soyā paḌā rahegā
vaqt-e-zavāl hai ham khilvāḌ dekhte haiñ
uThiye ki ye tamāshā yuuñ hī lagā rahegā
yaksar hamāre baazū shal ho rahe haiñ yārab
āḳhir darāz kab tak dast-e-duā rahegā