barsoñ paḌh kar sarkash rah kar zaḳhmī ho kar samjhā maiñ
har kūcha hai kūcha-e-qātil zaḳhmī ho kar sambhlā maiñ
tūfānī jazboñ se bach kar duur talak kaise jātā?
ek jazīra ban kar āḳhir lahroñ lahroñ Thahrā maiñ
kitne ādarshoñ ke shīshe rag rag meñ āzār bane
laḌte laḌte thak kar dekhā saaya thā aur tanhā maiñ
ā.īna kyā kis ko dikhātā galī galī hairat biktī thī
naqqāroñ kā shor thā har sū sachche sab aur jhūTā maiñ
'bāqar' tez shuāoñ se sab momī chehre pighal ga.e
sub.h talak pathrīle ġham the aur thā TūTā-phūTā maiñ