sub.h aatī hai to aḳhbār se lag jaate haiñ

shaam jo Dhaltī hai bāzār se lag jaate haiñ

ishq meñ aur bhalā is ke sivā kyā hogā

dar se uThte haiñ to dīvār se lag jaate haiñ

jab ghaḌī aatī hai insāf kī dhīre dhīre

jurm aa kar sabhī haqdār se lag jaate haiñ

hijr meñ tere to ik chup sī lagī rahtī hai

vasl meñ bātoñ ke ambār se lag jaate haiñ

vaqt aatā hai jo suulī se utarne kā mirī

sach simaT kar mirī guftār se lag jaate haiñ

ab ke mausam bhī ajab hai tirī bātoñ jaisā

sun ke bāteñ tirī ashjār se lag jaate haiñ

khol detī hai havas pahle to chhoTī sī dukāñ

dekhte dekhte bāzār se lag jaate haiñ

ḳhvāb hai, jhuuT hai, maayā hai yā koī vardān

ham to sab bhuul ke sansār se lag jaate haiñ