ḳhvār-o-rusvā the yahāñ ahl-e-suḳhan pahle bhī
aisā hī kuchh thā zamāne kā chalan pahle bhī
muddatoñ ba.ad tujhe dekh ke yaad aatā hai
maiñ ne sīkhā thā lahū rone kā fan pahle bhī
dil-navāz aaj bhī hai nīm-nigāhī terī
dil-shikan thā tirā be-sāḳhta-pan pahle bhī
aaj is tarah milā tū ki lahū jaag uThā
yuuñ to aatī rahī ḳhushbu-e-badan pahle bhī
'shāz' vo jānegā un āñkhoñ meñ kyā kyā kuchh hai
jis ne dekhī ho un āñkhoñ kī thakan pahle bhī