na aa jaa.e kisī par dil kisī kā

na ho yārab koī maa.il kisī kā

lagā ik haath bhī kyā dekhtā hai

kahīñ karte haiñ Dar qātil kisī kā

adā se us ne do bāteñ banā kar

kisī kī jaan le lī dil kisī kā

uThā jab dard-e-pahlū dil pukārā

nahīñ koī dam-e-mushkil kisī kā

abhī jiinā paḌā kuchh din hameñ aur

Talā phir vāda-e-bātil kisī kā

bahut āhista chilman ko uThānā

mileñ āñkheñ ki baiThā dil kisī kā

'hafīz' is tarah bharte ho jo aaheñ

dukhāoge magar tum dil kisī kā