saath rahte itnī muddat ho ga.ī
dard ko dil se mohabbat ho ga.ī
kyā javānī jald ruḳhsat ho ga.ī
ik chhalāvā thī ki champat ho ga.ī
dil kī gāhak achchhī sūrat ho ga.ī
aañkh milte hī mohabbat ho ga.ī
fātiha paḌhne vo aa.e aaj kyā
Thokaroñ kī nazr turbat ho ga.ī
laakh bīmārī hai ik parhez-e-mai
jaan jokhoñ tark-e-ādat ho ga.ī
tafraqa Daalā falak ne bār-hā
do diloñ meñ jab mohabbat ho ga.ī
vo gila sun kar hue yuuñ munfa.il
aa.ed apne sar shikāyat ho ga.ī
dostī kyā us talavvun-tabā kī
chaar din sāhab salāmat ho ga.ī
vaah re aalam kamāl-e-ishq kā
merī un kī ek sūrat ho ga.ī
un ke jaate hī huī kaayā palaT
ḳham masarrat yaas hasrat ho ga.ī
pī ke yuuñ tum kab bahakte the 'hafīz'
raat kyā be-lutf sohbat ho ga.ī