dil-e-nā-subūr ko phir vahī but-e-bevafā kī talāsh hai
ġham-e-ibtidā to uThā chukā ġham-e-intihā kī talāsh hai
kisī be-vafā kā gila bhī hai kisī bā-vafā kī talāsh hai
ye fareb-e-shauq ki dil ko phir kisī āshnā kī talāsh hai
tirā ġham hī ġham rahe umr-bhar tire ġham meñ ḳhud ko fanā karūñ
mujhe ibtidā-e-shu.ūr se isī intihā kī talāsh hai
ye vo jins hai ki jahān meñ jo na bik sake jo na mil sake
tujhe kyuuñ vafā kā junūn hai tujhe kyuuñ vafā kī talāsh hai
jo mile bhī ḳhizr to ab kahūñ ki salām āb-e-hayāt ko
na vo dil ko zauq-e-talab rahā na vo rahnumā kī talāsh hai
dil nā-sazā ko ye chāhtā huuñ ki chaah meñ kahīñ Daal duuñ
use hai gunāh kī justujū to mujhe sazā kī talāsh hai
na.e hausle na.e valvale mirī justujū meñ mudām haiñ
mujhe intihā-e-talāsh meñ bhī to ibtidā kī talāsh hai
tire is ilaaj meñ dam nahīñ tirī bas kā rog ye ġham nahīñ
mire dard ke liye chāragar tujhe kyuuñ davā kī talāsh hai
mujhe justujū hai junūn kī mujhe be-ḳhudī kī hai aarzū
mire kārvān-e-hayāt ko kisī rahnumā kī talāsh hai
tire saath hai tire paas hai na judā samajh vo judā nahīñ
ye ḳhudī kā parda uThā ke dekh agar haañ ḳhudā kī talāsh hai
ye hai hashr-e-'ḳhushtar'-e-nā-tavāñ yahāñ nafsī-nafsī kā hai samāñ
mujhe ab hujūm-e-gunāh meñ shah-e-dosarā kī talāsh hai