baaġh meñ rah ke bahāroñ ko nibhānā hogā
apnī rūThī huī ḳhushiyoñ ko manānā hogā
toḌnā hogā chhalakte hue sāġhar kā ġhurūr
bin piye bazm ko ab rañg pe aanā hogā
Dhālnī hogī usī raat ke dāman se sahar
TuuTe tāroñ ko ziyā-bār banānā hogā
thāmnī hoñ jo tujhe vaqt kī nabzeñ hamdam
uḌte lamhoñ pe koī naqsh jamānā hogā
in charāġhoñ meñ bhaḌak uTThe haiñ sho.ale 'anjum'
apnī rātoñ meñ diyā aur jalānā hogā