sitam-tarāz talak zaḳhm-āshnā bhī to ho
ufuq ufuq shafaq-e-dard kī hinā bhī to ho
ḳhalā-ba-pā huuñ magar dasht dasht ḳhāk-ba-sar
kuchh apnā aap miTāne kī intihā bhī to ho
maiñ ḳhaak ban ke fazā meñ bikhar bikhar jā.ūñ
kisī ke paañv tale zīna-e-sabā bhī to ho
havas kī barf badan se pighal to jaa.e magar
sharar sharar koī paikar kabhī chhuā bhī to ho
nazar nazar meñ hazāroñ savāl haiñ lekin
falak se koī mirī samt dekhtā bhī to ho
na.ī ghaḌī na.e sahrā na.e ufuq laa.ī
kisī tarah haq-e-āshuftagī adā bhī to ho
barahnagī mirā maz.hab mirā sulūk bane
magar badan pe kisī qadr kī ridā bhī to ho
mirī vafāoñ kī gahrā.iyoñ kā khoj to le
vo bahr-e-husn kabhī zarf-āzmā bhī to ho
faqat bayān-e-haqīqat nahīñ hai manzil-e-haq
jihat-shanās vo hai jo jihat-numā bhī to ho
tire sivā bhī kisī ko kahūñ nadīm magar
tire sivā koī shā.ista-vafā bhī to ho