sahrā meñ dīvār banānā jaane kaisā ho

aur phir is se sar Takrānā jaane kaisā ho

ye raste jo ham ne pag pag aap bikhere haiñ

in rastoñ se lauT ke jaanā jaane kaisā ho

jis kī poreñ dil kī ik ik dhaḌkan gintī haiñ

jis ko ham ne ḳhud gardānā jaane kaisā ho

us ke sāmne ham kyā jāneñ dil par kyā guzre

naam tak apnā yaad na aanā jaane kaisā ho

us kī nigāh meñ aanā koī chhoTī baat nahīñ

us ke dil meñ raah bhī paanā jaane kaisā ho

ham kyā jāneñ paar lageñ yā aar raheñ 'ḳhālid'

rah gum-karda mar-khap jaanā jaane kaisā ho