tund-ḳhūī pe tanz kar jā.ūñ
ban ke ḳhushbū havā ke ghar jā.ūñ
dushman-e-jāñ nafas nafas merā
dhuul kā phuul huuñ kidhar jā.ūñ
tū bhulā.e to kyā bhulā.e mujhe
nashsha huuñ kis tarah utar jā.ūñ
ḳhud ulajhtā huuñ ḳhud sulajhtā huuñ
kuchh nikhar jā.ūñ kuchh sañvar jā.ūñ
jism aur ishq ke havāle se
maiñ tirī ruuh meñ utar jā.ūñ
but ko dekhā to but huā 'ḳhālid'
jī meñ thā dekh kar guzar jā.ūñ