lab siye dekhā karūñ sochā karūñ
mere bas meñ kuchh nahīñ maiñ kyā karūñ
raah meñ hai dard kā koh-e-girāñ
kohkan bhī maiñ nahīñ maiñ kyā karūñ
shahr ke shor-o-shaġhab se bhaag kar
koī kunj-e-āfiyat DhūñDā karūñ
gunjalak maggham sadāoñ kī tarah
gumbad-e-tanhā.ī meñ gūñjā karūñ
aur in mub.ham sadāoñ kā agar
koī matlab ho to vo likkhā karūñ
aur jab apnī samajh meñ kuchh na aa.e
chīḳh uTThūñ kyā karūñ maiñ kyā karūñ
shahar kī vīrāniyoñ par nauhagar
ruuh ban kar rāt-bhar bhaTkā karūñ