savāl kā javāb thā javāb ke savāl meñ

giraft-e-shor se chhuTe to ḳhāmushī ke jaal meñ

burā ho ā.īñe tirā maiñ kaun huuñ na khul sakā

mujhī ko pesh kar diyā gayā mirī misāl meñ

baqā-talab thī zindagī shifā-talab thā zaḳhm-e-dil

fanā magar likhī ga.ī hai bāb-e-indimāl meñ

kahīñ sabāt hai nahīñ ye kā.enāt hai nahīñ

magar umīd-e-dīd meñ tasavvur-e-jamāl meñ

qadīm se haTe to ham jadīd meñ ulajh ga.e

nikal ke gardish-e-falak se mausamoñ ke jaal meñ