hisār-e-dīd meñ jaagā tilism-e-bīnā.ī

zarā jo lau tirī sham-e-badan kī tharrā.ī

na jaane kis se bichhaḌne ke rāg-rañg haiñ sab

ye zindagī hai ki furqat kī bazm-ārā.ī

sukūt-e-bahr meñ kis ġham kā raaz pinhāñ thā

bas ek mauj uThī aur aañkh bhar aa.ī

ye samt samt taḳhātub ufuq ufuq taqrīr

tirā kalām hai merā rafīq-e-tanhā.ī

ḳhirad kī rah jo chalā maiñ to dil ne mujh se kahā

azīz-e-man ''ba-salāmat-ravī o bāz-ā.ī''

uThā.e suur sarāfīl dekhtā hī rahā

bashar ke haath nizām-e-qayāmat-ārā.ī

kiyā thā jī kā ziyāñ ham ne ik ġhazal bhar ko

hazār sher kahe ho sakī na bharpā.ī