koī tanhā.ī kā ehsās dilātā hai mujhe

maiñ bahut duur huuñ nazdīk bulātā hai mujhe

maiñ ne mahsūs kiyā shahr ke hañgāme meñ

koī sahrā meñ hai, sahrā meñ bulātā hai mujhe

tū kahāñ hai ki tirī zulf kā saaya saaya

har ghanī chhāñv meñ le jā ke biThātā hai mujhe

ai mire hāl-e-pareshāñ ke nigah-dār ye kyā

kis qadar duur se ā.īna dikhātā hai mujhe

ai makīn-e-dil-o-jāñ maiñ tirā sannāTā huuñ

maiñ imārat huuñ tirī kis liye Dhātā hai mujhe

rahm kar maiñ tirī mizhgāñ pe huuñ aañsū kī tarah

kis qayāmat kī bulandī se girātā hai mujhe

'shāz' ab kaun sī tahrīr ko taqdīr kahūñ

koī likhtā hai mujhe koī miTātā hai mujhe