ḳhaak meñ miltī haiñ kaise bastiyāñ mālūm ho
aane vāloñ ko hamārī dāstāñ mālūm ho
jo idhar kā ab nahīñ hai vo kidhar kā ho gayā
jo yahāñ mādūm ho jaa.e kahāñ mālūm ho
marhala tasḳhīr karne kā ise āsān hai
gar tujhe apnā badan saarā jahāñ mālūm ho
jo alag ho kar chale sab ghūmte haiñ us ke gird
yuuñ judā ho kar guzar ki darmiyāñ mālūm ho
kitnī majbūrī hai lā-mahdūd aur mahdūd kī
be-karāñ jab ho sakeñ tab be-karāñ mālūm ho
ek dam ho raushnī to kyā nazar aa.e 'malāl'
kyā samajh pā.ūñ jo sab kuchh nā-gahāñ mālūm ho