nafas nafas ko havā kī rikāb meñ rakhnā
vajūd apnā kaf-e-āftāb meñ rakhnā
ġharīb-e-shahr tujhe tishnagī na le Duube
sambhal ke apnā qadam dasht-e-āb meñ rakhnā
ye vo gulāb haiñ jo dhuup sah nahīñ sakte
unheñ hamesha shab-e-māhtāb meñ rakhnā
ki jin kā chashm-e-nazāra tavāf karne lage
kuchh aise naqsh bhī dīvār-e-ḳhvāb meñ rakhnā
vo ḳhvāh phuul ho mahtāb ho ki sāġhar ho
koī bhī shai ho na us ke javāb meñ rakhnā
hasīn lafzoñ kī sūrat haiñ ḳhadd-o-ḳhāl us ke
'mubārak' un ko bhī apnī kitāb meñ rakhnā