phisalne vaalā thā ḳhud ko magar sambhāl gayā
ajiib shaḳhs thā vo baat hans ke Taal gayā
badalne vaalī hai rut sā.ebān se niklo
jo sho.ala-bār thā vo abr barshgāl gayā
tum apne aap ko pahchān bhī na pāoge
vo raushnī meñ añdherā agar uchhāl gayā
naqāb apnī burā.ī pe Dālnī thī use
vo lā ke ḳhaak mirī nekiyoñ pe Daal gayā
qusūr-vār maiñ Thahrā.ūñ ā.īne ko kyuuñ
jo boltā thā tirā ab vo ḳhadd-o-ḳhāl gayā
mizāj apnā 'mubārak' badal diyā maiñ ne
ḳhayāl us kā ga.e vaqt kī misāl gayā