dariyā ne kal jo chup kā libāda pahan liyā

pyāsoñ ne apne jism pe sahrā pahan liyā

vo TaaT kī qabā thī ki kāġhaz kā pairahan

jaisā bhī mil gayā hameñ vaisā pahan liyā

fāqoñ se tañg aa.e to poshāk bech dī

uryāñ hue to shab kā añdherā pahan liyā

garmī lagī to ḳhud se alag ho ke so ga.e

sardī lagī to ḳhud ko dobāra pahan liyā

bhauñchāl meñ kafan kī zarūrat nahīñ paḌī

har laash ne makān kā malba pahan liyā

'be-dil' libās-e-zīst baḌā dīda-zeb thā

aur ham ne is libās ko ulTā pahan liyā