bhuul kar tū saare ġham apne chaman meñ raqs kar

jaag ai darvesh-e-jāñ mere badan meñ raqs kar

Daal kar chādar vafā kī tū mazār-e-ishq par

dār-e-mansūrī pe aa is pairahan meñ raqs kar

tū garebāñ-chāk jo niklā hai ġham kī bhiiḌ meñ

jā chalā jā chhoḌ sab tū us ke man meñ raqs kar

bārgāh-e-husn meñ jhuk kar salāmī pesh kar

bāñdh kar ghuñgrū guloñ ke bāñkpan meñ raqs kar

kis liye jalne nahīñ detī charāġhoñ ko mire

ai havā tū jā kahīñ koh-o-daman meñ raqs kar

ye rumūz-e-ma.arifat tujh par ayaañ hoñge tabhī

pī tarīqat kā subū aur is agan meñ raqs kar