kuchh hasīnoñ kī mohabbat bhī burī hotī hai
kuchh ye be-chain tabī.at bhī burī hotī hai
jīte-jī mere na aa.e to na aa.e ab aao
kyā shahīdoñ kī ziyārat bhī burī hotī hai
aap kī zid ne mujhe aur pilā.ī hazrat
shaiḳh-jī itnī nasīhat bhī burī hotī hai
us ne dil māñgā to inkār kā pahlū na milā
ḳhāna-barbād muravvat bhī burī hotī hai
ai 'hasan' aap kahāñ aur kahāñ bazm-e-sharāb
pīr-o-murshid burī sohbat bhī burī hotī hai