Dar maut kā na ḳhauf kisī devtā kā thā

vo fat.h-yāb yuuñ thā ki banda ḳhudā kā thā

pahle bhī hādsāt hue zindagī ke saath

lekin jo aaj dekhā vo manzar balā kā thā

lo vo bhī gir gayā mire āñgan kā peḌ aaj

har vaqt jis se aasrā taaza havā kā thā

sun kar jise pahāḌoñ ke siine dahal ga.e

ye bhī karishma dosto apnī sadā kā thā

tūfāñ se bach nikalne kī sūrat na thī koī

ye faiz merī maañ ke hī dast-e-duā kā thā

tum bhī bhulā do tark-e-ta.alluq kā vāqi.a

ham bhī ye soch leñge ki jhoñkā havā kā thā

sāhil pe lā ke aap safīne jalā diye

ye kaam bhī 'vasīm' hamārī anā kā thā