vo itnā kam se kam to mehrbāñ hai
mirā hī naam zeb-e-dāstāñ hai
salīqe se jo kartā dushmanī bhī
sitamgar ab koī aisā kahāñ hai
kahānī shauq kī hai mere itnī
ki ik miTTī kā paanī par makāñ hai
mujhe ab kyā kisī shai kī zarūrat
tirā ġham jab matā-e-jāvedāñ hai
bhalā kaise yaqīñ is par karūñ maiñ
mirā mahbūb mujh se bad-gumāñ hai
kahānī facebōk par hai raqam ab
mohabbat apnī mash.hūr-e-jahāñ hai
mujhe 'ḳhushtar' vatan apnā hai pyārā
zamīñ par ḳhuld ye hindostāñ hai