tum ko apnā shumār karte haiñ
dīda-o-dil nisār karte haiñ
un kā mashq-e-sitam rahe jaarī
jin ko ham dil se pyaar karte haiñ
ham se to bad-gumāñ rahe to rahe
ham tirā e.atibār karte haiñ
ham banāte haiñ phuul kāñToñ ko
aap phūloñ ko ḳhaar karte haiñ
aap ko shauq hai to maz.hab ham
ishq kā iḳhtiyār karte haiñ
ham judā tum se rah nahīñ sakte
rishta phir ustuvār karte haiñ
baḳhshī 'ḳhushtar' ko dard kī daulat
shukr-e-parvardigār karte haiñ